आदर्श प्राथमिक विद्यालय आगाशिवनगर येथे ज्येष्ठ नागरिक दिवस आनंदात साजरा
आजी-आजोबांसोबत विद्यार्थ्यांनी साधल्या मनमोकळ्या गप्पा
आगाशिवनगर : आदर्श प्राथमिक विद्यालय आगाशिवनगर येथे ज्येष्ठ नागरिक दिवस उत्साहपूर्ण आणि आनंदी वातावरणात साजरा करण्यात आला. यानिमित्त शाळेतील विद्यार्थ्यांना ज्येष्ठ नागरिकांचा सहवास लाभावा आणि त्यांच्या अनुभवातून जीवनमूल्यांची शिकवण मिळावी, या उद्देशाने विशेष कार्यक्रमाचे आयोजन करण्यात आले.
कार्यक्रमासाठी परिसरातील आजी-आजोबा व ज्येष्ठ नागरिकांना शाळेत आमंत्रित करण्यात आले होते. विद्यार्थ्यांनी त्यांचे औक्षण व स्वागत करून त्यांच्याशी मनमोकळ्या गप्पा मारल्या. ज्येष्ठ नागरिकांनी आपल्या बालपणीच्या आठवणी, शालेय जीवन, जुन्या काळातील शिक्षणपद्धती, संस्कार, खेळ आणि जीवनातील विविध अनुभव विद्यार्थ्यांसोबत शेअर केले.
विद्यार्थ्यांनीही आजी-आजोबांना विविध प्रश्न विचारत त्यांच्या आठवणी जाणून घेतल्या. मोबाईल आणि तंत्रज्ञानाच्या युगात प्रत्यक्ष संवादातून मिळणारा प्रेमाचा, अनुभवाचा आणि संस्कारांचा ठेवा विद्यार्थ्यांना अनुभवता आला.
यावेळी ज्येष्ठ नागरिकांचा सत्कार करून त्यांचा सन्मान करण्यात आला. शिक्षकांनी विद्यार्थ्यांना ज्येष्ठांचा आदर करणे, त्यांचे अनुभव ऐकणे आणि त्यांच्या ज्ञानाचा उपयोग जीवनात करणे याबाबत मार्गदर्शन केले.
या उपक्रमामुळे शाळेतील विद्यार्थ्यांना पिढ्यांमधील संवाद, संस्कार, आपुलकी आणि ज्येष्ठांप्रती आदर यांचा सुंदर अनुभव मिळाला. कार्यक्रमामुळे विद्यार्थ्यांमध्ये आणि ज्येष्ठ नागरिकांमध्ये आनंदाचे व भावनिक नाते निर्माण झाले.
“ज्येष्ठांचे अनुभव ही पुढच्या पिढीची शिदोरी आहे” या भावनेतून आयोजित केलेला हा उपक्रम विद्यार्थ्यांसाठी अविस्मरणीय ठरला.
कोणत्याही टिप्पण्‍या नाहीत:
टिप्पणी पोस्ट करा